曼聯着「紅黑黑」組合　歐霸決賽和味濃？

曼聯官方宣布，球隊將於5月22日凌晨歐霸盃決賽，着主場紅色球衣，配黑色褲及黑色襪。睇番紅魔鬼今季表現，原來「紅黑黑」組合暗藏「和波密碼」。

曼聯傳統上主場全套服裝係紅衫、白褲、黑襪，但今場歐霸盃選擇着黑褲，球會官網指紅魔鬼對上一次以「紅黑黑」示人，係歐霸盃16強首回合作客打和皇家蘇斯達1比1。

曼聯今季英超唯一一次着紅衫、黑褲、黑襪，係作客逼和愛華頓2比2，所以唔少網民認為，曼聯今場決賽對熱刺，法定時間90分鐘應該會打和，甚至最終需要互射12碼分勝負。

熱刺仲未公布服裝組合，由於曼聯着黑褲，估計呢支倫敦勁旅應該會以全白登場。