迪馬利亞宣布離隊　有望同美斯重聚

賓菲加失落今季葡超錦標，老將迪馬利亞正式宣布，今季結束後離隊，唔會參加下月展開嘅世冠盃，盛傳呢位37歲阿根廷名將有可能加盟美職豪門國際邁亞密，同昔日國家隊好拍檔美斯再次合作。

迪馬利亞2年前離開祖雲達斯，重投成名地賓菲加，保持高水平發揮，總共上陣85場入32球，包括今季39次披甲入15球及10次助攻，呢位翼鋒今夏約滿，雙方未能達成續約協議。賓菲加喺葡超煞科戰打和布拉加1比1後，迪馬利亞話：「今場係我最後1次着呢件球衣踢聯賽。」賓菲加將於5月26日凌晨葡萄牙盃決賽對士砵亭，將成為迪馬利亞告別戰。

另外，國際邁亞密一直留意迪馬利亞動向，早於1年前已經想簽佢，加上近期目標人選奇雲迪布尼無意去美職搵食，所以可能再次邀請迪馬利亞加盟。

國際邁亞密由阿根廷名宿馬斯真蘭奴執教，加上擁美斯等9位阿根廷球員，相信迪馬利亞應該有興趣同一班同胞合作。