冇阿諾特又如何？巴特利續約利物浦　右閘無憂　

英超冠軍利物浦近期組軍積極，雖然阿歷山大阿諾特「叛逃」皇家馬德里，令一眾利迷眼火爆，不過利物浦閃電平息怒火，繼傾掂簽入荷蘭國腳謝利美費林邦後，周六(17日)又宣布同新星干拿巴特利續約4年，未來幾年右閘無憂！

各大傳媒報道，利物浦已經同利華古遜嘅謝利美費林邦達成協議，並會啟動佢合約內2,950萬鎊買斷條款，預計會成為利物浦新嘅正選右閘。除此之外，原本被睇好有力繼承阿諾特位置嘅巴特利，亦已落實續約4年，呢位北愛爾蘭國腳新合約會去到2029年。

現年21歲嘅巴特利續約後表示：「簽新約後，我好榮幸同開心去見證未來嘅旅程會係點，我會腳踏實地咁去努力練習，過去2年喺一隊嘅經歷係好神奇，希望之後繼續保持，有更多上陣機會、贏更多冠軍、製造更多美好回憶。」