C朗續約遇阻搵定後路　計劃收購西乙球會

C朗同沙特阿拉伯豪門艾納斯續約出現阻滯，球員生涯亮起紅燈，呢位40歲葡萄牙國腳似乎正在為離隊做準備，根據西班牙《馬卡報》爆料，C朗計劃收購西乙球會艾美利亞部分股權，一嘗做班主滋味，甚至一旦離開沙特，都可以加盟艾美利亞，以老闆兼球員身份繼續踢波。

據悉C朗之所以想入股艾美利亞，皆因佢同球會老闆杜基艾謝赫非常老友，呢位沙特富商當年有份穿針引線，促成C朗加盟艾納斯，幫佢獲得天價薪酬，C朗現時想做班主，首選同杜基艾謝赫合作。C朗效力皇馬時期，曾經7次射入艾美利亞大門，對呢支球隊充滿「好感」。

艾美利亞排聯賽第6位，有望取得升班附加賽資格，如果最終重返西甲，相信C朗入股機會將進一步增加，因為佢可以大條道理為艾美利亞效力，再戰西甲。