曼聯扑錘簽根夏　巴西前鋒係「散步王」？

曼聯自從C朗拿度離隊後，一直缺少一名頂級前鋒，海倫、約舒亞舒克斯都難當大任，佢哋喺歐霸盃決賽前就有好消息，據報已成功簽入狼隊前鋒馬菲奧斯根夏，轉會費為6,250萬鎊。不過，呢位巴西前鋒今季有項羞家數據，或會令曼聯球迷擔心。

轉會權威記者羅曼諾爆料：「曼聯好接近完成收購根夏！呢位巴西球星接納曼聯嘅計劃，薪酬條件亦差唔多傾好，轉會就快落實，搞埋最後細節就可以Here We Go！」英國《天空體育》亦指出，曼聯將啟動根夏合約內6,250萬鎊買斷條款。

根夏今季英超有15個入波同6次助攻，不過佢喺其他方面嘅效率就引起懷疑，今年3月英超官網就公開「散步時間」統計，根夏嘅比賽時間當中，有77.6%時間係處於「步行狀態」，喺全英超排第1位，佢同艾達馬查奧爾係前5名當中僅有嘅非後防球員。