奇雲迪布尼感人告別　哥迪奧拿落淚

曼城周三(21日)凌晨主場擊敗般尼茅夫，亦係傳奇球星奇雲迪布尼最後1次喺曼城主場亮相，由賽前到賽後都係呢位比利時中場嘅歡送派對，連領隊哥迪奧拿亦感動落淚。美中不足係，奇雲迪布尼今仗曾門前3碼面對空門射中楣，未能用入波告別主場粉絲。

奇雲迪布尼夏天約滿，以結束曼城10年光輝歲月，今場係佢最後一次喺主場出戰，曼城亦安排盛大儀式送別。奇雲迪布尼老婆仔女都有入場，看台上亦展示奇雲迪布尼嘅超巨型海報，當儀式進行期間，哥迪奧拿更感動流淚，場面相當感人。

奇雲迪布尼賽後表示：「我想像歡樂帶畀人，踢進攻同具創意嘅足球，過去10年充滿快樂，創造一啲神奇嘅事，令曼城變得更好，呢個過程難以置信又非常快樂。有邊個人可以有5萬人同佢講再見？好多謝大家。」

奇雲迪布尼今仗本來有機會入波，上半場接應隊友傳中，門前3碼對住個空門竟然射中門楣，呢位老將賽後亦自嘲：「呢次失機真係好肉酸，冇任何藉口，我個仔一定唔會放過我！」