嫌曼城太豪華？哥迪奧拿：唔賣人我就辭職！

曼城今季曾受嚴重傷患困擾，搞到衞冕之路早早投降，冬天狂燒2億鎊增兵後，終於爬番上前列位置。隨住主力陸續傷愈，曼城依家更有「人滿之患」，估唔到領隊哥迪奧拿又唔滿意，埋怨球隊「太多人」，講明「唔賣人我就辭職！」

曼城周三(21日)凌晨3比1贏般尼茅夫一仗，卡胡辛洛夫、沙雲奴、占士麥艾迪同歷高利維斯4位球星，連大軍名單都入唔到。哥迪奧拿表示：「我同球會講咗唔想要龐大陣容，我唔想每場將5至6個球員擺入雪櫃，我唔想咁樣，我寧願辭職。將個陣容整細啲，我就會留低。要球員坐喺看台冇得踢，我個靈魂承受唔到呢個做法。」

曼城今季曾出現嚴重傷兵，令哥帥無兵可用，但佢就唔介意：「今季有3、4個月我揀唔到11個人，甚至冇晒後衞，情況好惡劣，但依家傷兵返晒嚟，情況唔可能維持到下季。」目前確定離隊嘅有奇雲迪布尼，傳聞基亞利殊亦好大機會被賣走。