有毛有翼！英超4大「鳥類球隊」齊齊捧盃

英超聯賽近年水平大大提升，今季更加百花齊放，國內外不同賽事一共出現4支不同嘅冠軍球隊。最特別嘅係，今季4隊冠軍利物浦、紐卡素、水晶宮同熱刺，全部隊徽都有鳥類做圖案，全部成功展翅高飛！

利物浦壓倒阿仙奴重奪英超冠軍，佢哋個隊徽就有著名嘅「利物鳥」(Liver Bird)，亦係佢哋城市嘅標誌。本來利物浦有機會做雙冠王，可惜喺英聯盃決賽，輸畀另一支「鳥類球隊」紐卡素，亦係「喜鵲」70年來首個本土賽事冠軍。

上個星期英足盃決賽，輪到隊徽有隻雄鷹嘅水晶宮發威，自70年代開始引用雄鷹做隊徽嘅水晶宮，球會綽號亦係叫Eagles，果然食住今季「旺鳥」嘅氣勢，成功擊敗曼城捧盃。歐霸盃決賽，就到「鬥雞」熱刺打贏「紅魔鬼」，真係不得「鳥」！