史上最低水平決賽？熱刺成「最渣冠軍」

歐霸盃決賽由英超球隊內戰，熱刺同曼聯分別排喺聯賽第17位同第16位，今場決賽嘅質素亦反映出呢個可悲現實，名宿奧雲、名嘴皮爾斯摩根都批評場波水平係決賽史上新低。

熱刺以英超17名身份捧盃，係歐霸盃史上聯賽排名最低嘅冠軍，比22/23球季西維爾排西甲12位仲衰多兩錢。另外，熱刺今場只得3次射門(1次中龍)同27%控球率，同樣係歷史最低。

曼聯雖然控制戰局，但進攻質素都樣唔掂，表面上有16次攻門，但預期入球(xG)只得0.97球，連1球都達唔到，最後「食白果」並唔令人意外。

前利物浦、曼聯球星奧雲表示：「呢場波嘅水平低到難以置信，兩隊波都唔可以完成連續3腳傳送。」向來多口嘅英國名嘴皮爾斯摩根，喺比賽期間亦話：「呢場肯定係史上最差嘅歐洲賽決賽，渣到令人震驚，但呢班冇用鬼，其中一隊會喺下季踢歐聯......」