國米慘成球證誤判「苦主」　白白冇咗10分

今季意甲爭標形勢激烈，榜首拿玻里僅領先第2位國際米蘭1分，根據意大利倫巴底電視台報道，衞冕嘅國際米蘭本來應該可以大幅領先，但因為球證多次誤判，導致球隊累積失10分，否則早已提早捧盃。

國際米蘭上場對拉素，受到多次不利判決，包括恩比錫克喺禁區內被對手洛維拿推跌，但球證視若無睹，反而比賽末段，拉素前鋒卡斯迪蘭奴斯近距離起腳，省中恩比錫克手肘，卻吹罰12碼，但呢位中堅當時已將雙手擺身後，冇意圖犯規，結果國米因為呢球12碼，被逼和2比2，錯失升上榜首機會。

根據倫巴底電視台統計，國米今季聯賽因為球證誤判，總共冇咗10分，同樣因為球證誤判，拿玻里只失1分，換言之，撇除誤判失分因素，國米現時應該領先拿玻里8分，可提早奪冠。

另外，祖雲達斯成為球證誤判最大得益者，因此多咗5分，成為現時可以排第4位嘅關鍵因素。