國米面臨「雙失」　細恩遭沙特豪門挖角

國際米蘭衞冕意甲錦標失敗之外，仲面臨主帥離隊危機，根據法國傳媒爆料，沙特阿拉伯豪門希拉爾向國米教練施蒙尼恩沙基開出一份2,500萬歐元(約2.2億港元)年薪嘅2年合約，力邀佢執教。據悉「細恩」老婆近日帶埋囝囝飛赴希拉爾主場所在城市利雅得，了解當地生活情況，施蒙尼恩沙基似乎有意跳槽。

施蒙尼恩沙基2021年開始擔任國米主帥，協助球隊奪得上季意甲冠軍，並繼2023年之後，再次率領球隊打入今屆歐聯決賽，教波功力備受認同。呢位49歲意大利少帥上年夏天同國米續約至2026年，稅後年薪加至700萬歐元，但相比希拉爾開出嘅2,500萬歐元年薪，簡直小巫見大巫。

據悉施蒙尼恩沙基原本無意離隊，但隨住國際米蘭連接失去意大利盃及意甲錦標，一旦喺6月1日凌晨歐聯決賽輸波，今季就會四大皆空，屆時難免有下台壓力，搵老婆去沙特探路，實屬合理。至於「細恩」最終會否去沙特挖金，好大程度上要睇歐聯決賽結果而定。