「大哨」出售華拉度列　作價4.4億要蝕本

來季降落西乙嘅華拉度列官方宣布，董事會主席「大哨」朗拿度將名下股權出售予一間投資集團，作價5,000萬歐元(約4.45億港元)，表示朗拿度不再擔任華拉度列班主。

西班牙傳媒報道，朗拿度持有華拉度列82%股份，近日將股權出售予一間由歐洲資金資助嘅北美投資集團，並已簽署協定，結束長達7年班主生涯，華拉度列在朗拿度主政期間，曾3度降班及2度升班，戰績未如人意。

朗拿度於2018年入股華拉度列，當時以3,000萬歐元購入球會51%股份，之後不斷增持至82%，期間亦有注資增兵，數年前曾有買家出價8,000萬歐元求購，不過當時朗拿度認為華拉度列價值超過1億歐元而拒絕，但依家只能以5,000萬歐元出售，今次買賣以蝕本告終。

蝕錢事少，朗拿度擔任華拉度列班主期間，因為球隊成績太差引發球迷不滿，今季多次在主場示威抗議，有球迷製作假銀紙諷刺朗拿度唔識搞波，令佢相當冇癮。