曼聯訓練場開大會　加拿祖獲通知「搵定球會」

曼聯失落歐霸盃冠軍後，今季嘅慘淡戰績已塵埃落定，煞科戰對阿士東維拉前，球會喺卡寧頓訓練基地舉行一次內部會議，據報領隊魯賓艾摩廉宣布下季將繼續留隊，不過阿歷真度加拿祖就被告知可以執包袱，搵定下一間球會！

據《The Athletic》報道，艾摩廉喺周六(24日)嘅訓練後召開會議，向球員公開佢嘅個人計劃，包括承諾下季將會繼續執教，不過消息人士透露，喺決賽後公開批評艾摩廉嘅加拿祖，就被艾摩廉通知「冇得留低」，可以搵定新球會落班。曼聯方面以會議內容屬更衣室機密為由，拒絕作出評論。

加拿祖喺歐霸決賽被貶後備，佢賽後直指「唔知點解」自己突然冇得踢，佢細佬亦喺社交網指責艾摩廉「出賣」加拿祖。事實上，《The Athletic》喺今年1月已經報道，曼聯打算賣走加拿祖、文奴等青訓球星，以換取更多嘅財政空間進行重建。