拿玻里「終極合約」再斟迪布尼　下周有定案

曼城中場奇雲迪布尼今夏約滿離隊，意甲冠軍拿玻里非常渴望簽入呢位33歲比利時國腳，根據「轉會權威」記者羅曼諾(Fabrizio Romano)爆料，拿玻里近日加緊行動，希望下周可以落實簽入奇雲迪布尼。

據悉拿玻里向奇雲迪布尼開出一份薪酬總值2,700萬歐元(約2.4億港元)嘅3年合約，換言之平均年薪為700萬歐元(約8,000萬港元)，遠低於佢效力曼城嘅2,080萬鎊(約2.2億港元)年薪，由於拿玻里財力有限，呢份合約可能已經係終極報價。

事實上，如果奇雲迪布尼想繼續留喺歐洲聯賽，只能接受減人工，否則要去中東搵食，先至有機會保持現時薪酬，估計佢好快會為去向做出最後決定。