倣效高普　施洛有望續約6年

施洛今季首度執教利物浦，就率領球隊奪得英超冠軍，教波功力備受認同，英國傳媒指利物浦班主芬威體育集團計劃同呢位46歲荷蘭少帥續約6年，重演當年以長約綁實高普，建立「紅軍盛世」。

高普2015年10月開始擔任利物浦主帥，當年簽約3年，該季結束後，會方立即同佢續約6年，事後證明決定非常正確。無獨有偶，施洛上年夏天都係同利物浦簽約3年，由於成績出色，近日傳出會方有意同佢續約6年，就好似高普一樣。

施洛接受傳媒訪問，亦表明願意長期留效：「紅軍有長期由同1位領隊執教嘅傳統，球壇上普遍球會缺乏耐性，但英格蘭球會例外，就好似阿仙奴嘅雲格，曼聯嘅費格遜執教好多年。」施洛認為一支球隊要創出王朝，最需要有耐性。

不過，施洛亦承認自己要好似高普執教利物浦長達9年，言之尚早，畢竟必須交出好成績，先至可以獲得留用。