【有片】美斯入靚絕罰球 但國際邁亞密又失分
去片睇美斯入靚絕罰球
球星如雲嘅美職豪門國際邁亞密，今季成績大退倒，周日(25日)聯賽作客費城聯，即使球王美斯射入靚絕罰球，但只能打和3比3，連續4場不勝。
國際邁亞密上仗慘吞奧蘭多城3蛋，今仗演出仍然冇起色，上半場已經落後2球。換邊之後，國際邁亞密靠艾蘭迪近門頂入追至1比2，但好快又被費城聯前鋒巴利保射成3比1，呢位27歲以色列國腳今仗梅開二度。
眼見國際邁亞密面臨又輸1場，美斯發威，87分鐘離門約25碼主射罰球破網，戰至補時，國際邁亞密靠後備上陣嘅泰拿斯高施高維亞射成3比3，驚險執番1分，近4場聯賽只有2和2負。
盛傳國際邁亞密又準備簽入星級老將提升實力，今夏約滿離開賓菲加嘅迪馬利亞，以及告別皇馬嘅莫迪歷，都成為國際邁亞密招攬目標。