【官宣】坦哈格搵到新工　成為利華古遜主帥

利華古遜周一(26日)官方宣布，坦哈格成為球隊新主帥，接替剛離隊轉投皇家馬德里嘅沙比阿朗素，雙方簽約2年。

55歲嘅坦哈格去年10月離開曼聯後，過去7個月傳過與多支球隊聯繫，包括其舊東家阿積士，另邊廂利華古遜自宣布沙比阿朗素季尾離隊後，亦有多名候選人包括法比加斯可供挑選，最終坦哈格同利華古遜互相選定對方，簽約作實。

坦哈格與利華古遜簽約2年至2027年6月，該位荷蘭藉主帥表示：「利華古遜是德國其中一支最佳球隊，亦係歐洲頂尖球隊之一，會方向我提供一個絕佳環境，我將會延續利華古遜過去幾年展現嘅野心，接受新挑戰。」

利華古遜體育管理總監路菲斯表示：「坦哈格過去在阿積士取得成功，轉教曼聯在困難環境下仍取一定成就，喺佢帶領下，利華古遜將會朝住德甲、德國盃同歐聯3大錦標進發。」