利安戴納下季去邊隊　 今個星期做決定

英超球季結束，葉士域治前鋒利安戴納唔會隨隊降班，但會轉投邊隊，據報將於今個星期做決定。

利安戴納同葉士域治仲有4年約，不過球隊降班，佢亦可以搵出路，解約金3,000萬鎊(約3.18億港元)，由於佢要代表英格蘭U21出戰U21歐國盃，因此佢希望喺出發前為來季去向做決定。

過去兩個多月，利安戴納經理人先後同曼聯、車路士、紐卡素同愛華頓代表會面，除咗傾人工，佢最關心係能否保證上陣時間，以增加自己入選世界盃機會。

雖然歐洲賽事資格都好重要，不過利安戴納認為曼聯仍然係勁旅，而且佢本人希望返回英格蘭西北地區，因此曼聯都係佢選項之一，而曼聯亦視利安戴納為中鋒首選，上陣時間有保證，佢會唔會揀曼聯，好快會揭盅。