熟晒路！基華拉斯基利亞要「雙殺」國米？

巴黎聖日耳門(PSG)力爭首個歐聯冠軍，決賽對手係國際米蘭，不過PSG陣中都有唔少喺意甲搵食嘅球員，其中格魯吉亞翼鋒基華拉斯基利亞，憑住上半季喺拿玻里嘅貢獻，已經先壓倒國米拎到意甲冠軍獎牌，今場有機會再喺歐聯「雙殺」國米！

拿玻里早前喺意甲力壓國米奪冠，雖然基華拉斯基利亞已經轉會，但佢上半季嘅5個入波同3次助攻，亦係冠軍功臣之一，加上下半季協助PSG喺法甲封王，呢位24歲翼鋒今季已有意甲、法甲同法盃3面冠軍獎牌，當然歐聯冠軍先係真正「大獎」。

基華拉斯基利亞過去6次對國米都未入過波，但佢就話如果有需要，可以提供資訊協助教練安歷基：「我可以提供資訊，喺意甲踢咗咁耐，我知道國米有幾強大，有需要嘅話我一定會幫手，大家都盡最大努力，不過我認為安歷基未必需要我幫手，佢哋乜都搞得掂。」