【官宣】拒絕兩大豪門邀請　迪基亞續約3年

意甲球隊費倫天拿正式宣布同門將迪基亞續約至2028年，並加佢超過1倍人工，呢位34歲西班牙鋼門近期獲得摩納哥、拜仁慕尼黑垂青，但佢決定留隊，報答費倫天拿知遇之恩。

迪基亞2年前不獲曼聯續約，導致有1年時間冇波踢，直至上年夏天獲費倫天拿簽入，先至可以延續球員生涯。迪基亞亦以動作證明自己寶刀未老，今季意甲有出色表現，協助「紫百合」獲得聯賽第6位，打入歐協聯4強，因而引起摩納哥、拜仁慕尼黑關注，希望簽入佢。

迪基亞原本同費倫天拿簽約1年，雙方有權選擇續約多1年，會方最終決定直接向佢開出3年合約，作為回報，每年固定薪酬及獎金總額可達270萬歐元(約2,400萬港元)，比佢現時100萬歐元年薪多超過1倍。當迪基亞完成合約，屆時已經37歲，意味可能效力費倫天拿至掛靴。

另外，費倫天拿教練柏拿甸奴已經辭職，會方正在尋找新帥，人選包括皮奧利、迪羅斯。