貝迪斯為留住安東尼　向曼聯提出雙贏方案

貝迪斯為留住曼聯借將安東尼馬菲奧斯，可謂出盡法寶，據報佢哋希望向曼聯洽購安東尼部分擁有權，畀球員繼續留喺西甲征戰，仲話咁做曼聯都有着數，何解？

曼聯2022年以1億歐元向阿積士買入安東尼，成為紅魔史上第3貴收購，但球員喺英超未能踢出身價，兩季半上陣96場僅入12球，其價值亦急速下跌，現時估價僅剩2,000萬歐元，曼聯損失慘重。

雖然身價大跌，但曼聯仍希望能以5,000萬歐元出售安東尼，可惜無法搵到買家接貨，而今年初外借貝迪斯後終於出現轉機。

安東尼在貝迪斯半季獲得重生，上陣26場攻入9球，用表現證明自己仍有能力在歐洲高水平賽事立足，不過貝迪斯財力不足，無法向曼聯買斷安東尼。

西班牙傳媒報道，貝迪斯將與曼聯開會，討論安東尼去留，貝迪斯提出一個方案，就係購入安東尼部分擁有權，畀安東尼繼續留喺西甲比賽，只要球員繼續交出好表現，身價繼續上升，之後高價出售，曼聯先有機會取得更高收益。