亞洲第2人！李康仁捧盃　歐超盃大戰孫興民

繼07/08球季朴智星協助曼聯贏歐聯冠軍後，另一南韓球星李康仁，周日(1日)凌晨亦隨巴黎聖日耳門(PSG)稱霸歐洲，成為史上第2個贏歐聯冠軍嘅亞洲球員。8月份嘅歐超盃，李康仁更有望同「師兄」孫興民效力嘅熱刺交鋒！

南韓名將朴智星喺2008年首為首個贏歐聯冠軍亞洲球員後，一直未有第2個人做到，宇佐美貴史(拜仁慕尼黑)、孫興民(熱刺)同南野拓實(利物浦)都入過決賽，但全部飲恨而回。24歲嘅李康仁雖然下半季失寵，自8強開始已冇上陣，但今屆歐聯亦有11次出場紀錄，決賽亦喺後備名單上，唔係全無貢獻。

早前孫興民率領熱刺拎歐霸盃冠軍，意味歐超盃可能會出現李康仁大戰孫興民嘅場面，兩人喺上年初亞洲盃期間爆出「乒乓風波」，李康仁整傷孫興民手指，不過兩人已冰釋前嫌，如果李康仁今夏冇被賣走，歐超盃有機會上演南韓內戰。

其實，今次唔係第1次出現南韓球員包攬歐聯同歐霸場面，2008年朴智星拎歐聯冠軍嗰陣，同年金東進同李浩就協助辛尼特贏歐霸盃冠軍，朴智星同金東進亦有參與之後嘅歐超盃。