蘇斯克查出手　力邀卡斯米路轉戰土超

蘇斯克查今年1月成為土超球隊比錫達斯主帥後，率領球隊取得佳績，呢位挪威名宿開始為下季組軍做準備，計劃向前度執教球隊曼聯挖角，有意簽入卡斯米路。

蘇斯克查臨危受命，協助季中陷入低谷嘅比錫達斯成功翻身，獲得聯賽第4名，管理層現時十分信任「蘇B」，準備開水喉畀佢增兵，增加下季奪冠機會，蘇斯克查立即想簽入卡斯米路。

雖然呢位33歲巴西國腳近年水準走下坡，但近期重拾勇態，成為紅魔鬼打入歐霸盃決賽嘅功臣，蘇B認為佢嘅技術及大賽經驗，轉戰土超，仍然鶴立雞群，可以大幅增強中場控制能力。

事實上，由於卡斯米路周薪高達35萬鎊(約370萬港元)，曼聯一直想出售佢，以減輕財政負擔，加上只剩下1年合約，估計840萬鎊(約8,900萬港元)轉會費就有交易，比錫達斯絕對負擔得起。不過，如果卡斯米路加盟比錫達斯，好可能需要減人工，未知佢願唔願意接受。