「湯柏」合約最後倒數　巴塞力爭免費簽入

阿仙奴中場湯馬士柏迪將於6月底約滿，但雙方仍然未能達成續約協議，根據英國《太陽報》爆料，西甲冠軍巴塞隆拿已經派人同柏迪嘅經理人團隊展開會談，遊說呢位即將32歲嘅加納國腳今夏以自由身加盟。

雖然阿仙奴領隊阿迪達曾經公開表示，希望湯馬士柏迪留隊，但續約談判進度緩慢，存在唔少分歧，尤其是兵工廠管理層認為柏迪現時20萬鎊(約210萬港元)周薪太高，要求佢減人工，呢位防守中場自然唔接受，導致傾唔掂數。加上阿仙奴好大機會收購皇家蘇斯達中場蘇比文迪，所以唔介意放走湯馬士柏迪。

至於巴塞隆拿近年因為財困，積極招攬自由身球員，大賽經驗豐富嘅湯馬士柏迪成為主要目標。事實上，湯馬士柏迪非常熟悉西甲，皆因佢出身於馬體會青年軍，並為一隊出戰5個球季，直至2020年轉投阿仙奴，加盟巴塞隆拿，應該可以迅速適應環境。