莫迪歷進軍意甲　口頭答應加盟AC米蘭

早前宣布將結束13年皇家馬德里生涯嘅莫迪歷，據報將會以39歲高齡進軍意甲。消息指莫迪歷已同AC米蘭達成口頭協議，短期內就會正式簽1+1年合約，喺意大利延續佢嘅足球傳奇。

意大利《天空體育》報道，AC米蘭新任總監泰爾對莫迪歷志在必得，連番遊說後獲莫迪歷口頭答應加盟，預計今個星期就會正式簽約。莫迪歷目前行程緊密，既要為克羅地亞踢世盃外，緊接又要幫皇家馬德里踢埋世冠盃，之後先至會正式向AC米蘭報到。

轉會權威羅曼諾報道，AC米蘭開出嘅合約係1+1年，年薪約350萬歐元。由於AC米蘭下季拎唔到歐洲賽資格，賽程壓力相對唔大，39歲嘅莫迪歷有信心可以繼續交出高水平表現。據報莫迪歷自細就係AC米蘭球迷，令今次轉會一拍即合。