當拿隆馬「倒米」同經理人作對　稱留效PSG

基安盧基當拿隆馬協助巴黎聖日耳門(PSG)奪得今屆歐聯冠軍，但前途成疑，經理人安素拉奧拿日前表示，呢位鋼門可能重返意甲，藉以向PSG施壓，要求獲得更佳待遇。不過，當拿隆馬「倒米」話始終最想留隊，似乎想一洗「反骨仔」負面形象。

基安盧基當拿隆馬將於明夏約滿，仍未同PSG達成續約協議，經理人安素拉奧拿話唔排除呢位26歲門將會再戰意甲：「我從來唔會拒絕意甲強隊提出斟介，當拿隆馬重返米蘭，並非冇可能，但仲未展開任何談判，大家拭目以待。」據悉安素拉奧拿曾現身國際米蘭總部，似乎去傾當拿隆馬轉會事宜。

意大利出戰世盃外對挪威前夕，當拿隆馬開腔回應轉會傳聞：「我唔知拉奧拿去咗國米總部，總之我效力PSG感覺非常好，留隊係首選，至於同唔同我續約，由球會決定，我已準備好繼續效力PSG好多年。」當拿隆馬2021年拒絕同母會AC米蘭續約，以自由身轉投PSG，一直被A米球迷批評貪錢。PSG財力雄厚，相信可以向當拿隆馬開出新「肥約」，畀佢做番「忠臣」。

另外，當拿隆馬話為PSG捧歐聯冠軍，並非「太開心」，因為私下同多位國米球員非常老友，希望球迷今次世盃外全力為國家隊打氣，幫意大利足球重振聲威。