耶馬率西班牙5比4贏法國　金球獎形勢大逆轉

歐國聯決賽上演「雙牙」大戰！周四(6日)凌晨舉行嘅4強賽事，西班牙喺一度領先4球下，最後激戰5比4力克法國，下周一(9日)凌晨會同葡萄牙爭逐冠軍寶座。17歲「新球王」拉明耶馬今場梅開二度，鋒芒盡蓋法國前鋒奧士文尼迪比利，令今年嘅金球獎選舉形勢出現逆轉！

西班牙上半場表現極佳，23分鐘耶馬右路策動攻勢，傳中奧耶沙巴爾助攻尼高拉斯威廉斯射入；2分鐘後，米基爾馬連奴後上入楔單刀射成2比0。54分鐘耶馬博到12碼，佢親自操刀拉開到3球，1分鐘後柏迪再建一功，西班牙領先4球已為大局已定。

如夢初醒嘅法國，59分鐘由基利安麥巴比射入12碼破蛋，但耶馬67分鐘一記窄角度抽射入網，成功穩住局面。法國喺尾段由卓基轟入世界波，加上丹尼爾維維安烏龍波，以及高路梅安尼補時入波連追3球，可惜為時已晚，衞冕嘅西班牙得以贏5比4晉級決賽。

今場被視為耶馬同迪比利嘅「金球爭奪戰」，迪比利早前帶領巴黎聖日耳門贏歐聯冠軍，被視為金球獎大熱門，但係今場正面對決，迪比利就表現沉靜，鋒芒輸晒畀耶馬，如果西班牙最後喺歐國聯成功衞冕，耶馬嘅「叫座力」肯定大大提升。

只得17歲嘅耶馬賽後表示：「法國係支偉大球隊，難踢係好正常，所以贏波我好開心，決賽對手葡萄牙都一樣，但我哋目標係將冠軍帶返屋企。」對於金球獎爭奪，耶馬就話：「我經常同阿媽講，我每朝起身嘅動力就係踢波，我應該喺球場上用腳說話，迪比利係偉大球員，不過入決賽係我哋。」