又等4年！國足大換血10人或退役

中國隊周三(5日)喺世盃外0比1輸畀印尼，肯定無緣明年世盃決賽周，連續6屆衝擊世盃失敗。國足踢埋分組賽最後1場「例行公事」後，未來1年半都冇正式世界賽要踢，將會進行全面重建，主帥艾雲高域勢必離隊，亦有10名老將傳將會退役。

71歲嘅艾雲高域執教國足1年幾，表現係「彈多個讚」，今場生死戰起用幾位中超後備兵擔正，同樣引起唔少批評。據報呢位克羅地亞教練嘅合約係「階段性」，如果國足入到附加賽，佢順理成章會繼續執教，但隨住任務失敗，艾雲高域嘅合約就會跟住分組賽一齊完結，下場對巴林會係佢最後一次帶中國隊。

艾雲高域賽後表示：「我哋出線失敗，作為主教練肯定要負最大責任。多謝所有球員作戰到最後1分鐘。」國足下一個世界大賽，會係2027年初嘅亞洲盃，雖然下個月仲有個東亞盃，但國足未必會派主力出戰，嚟緊嘅任務係重建國家隊，為下屆世盃鋪路。

國足要為2030世盃做準備，依家多名老將都可能退位，有傳王大雷(36歲)、顏駿凌(34歲)、劉殿座(34歲)、李磊(33歲)、蔣光太(31歲)、王上源(32歲)、李源一(31歲)、韓鵬飛(32歲)、韋世豪(30歲)、武磊(33歲)等，都好難再衝擊下屆世盃。