亞洲多3隊出線！烏茲別克、約旦創歷史

經過周三(5日)世盃外亞洲賽連場大戰後，再多3隊亞洲球隊落實出戰明年決賽周，南韓、烏茲別克同約旦齊齊拎到出線資格，其中烏茲別克同約旦更加係首次進軍世盃決賽周，成功創造歷史！

烏茲別克喺A組打和爭出線對手阿聯酋0比0後，提早1輪鎖定前兩名位置，陣中球星有效力曼城嘅中堅卡胡辛洛夫，曼城官網亦發文祝福烏茲別克首度打入世盃決賽周。

另一支世盃「新丁」係B組嘅約旦，佢哋作客3比0大勝阿曼，由於第3名嘅伊拉克吞南韓2蛋，令南韓同約旦包辦小組前兩名直接出線席位，今次亦係南韓連續第11屆出戰決賽周。約旦國王阿卜杜拉二世賽後喺社交網發文，祝賀約旦國家隊為國爭光。

目前已有10支球隊拎到明年世盃決賽周入場券，其中亞洲區有5隊，分別係日本、伊朗、南韓、烏茲別克同約旦，另外仲有南美區嘅阿根廷、大洋洲區嘅新西蘭，以及3支東道主美國、墨西哥、加拿大。