基亞利殊可能重返維拉　但有一個條件

基亞利殊被踢出曼城世冠盃名單後，離隊已成定局，據報除咗有意甲球隊想簽佢之外，佢母會阿士東維拉亦有機會接收，不過先決條件係要佢減人工。

英國傳媒報道，由於傷病太多同狀態不穩，呢位「1億先生」出場順序不斷下降，終於跌到連出場名單都冇份，但佢同曼城仲有2年約，周薪30萬鎊(約318萬港元)，想搵球隊接收都唔係咁易。

基亞利殊離隊最佳途徑係外借，據報拿玻拿同AC米蘭兩支意甲球隊都對佢有興趣，沙特職賽都有可能，不過佢嘅最佳去處可能係維拉。

29歲嘅基亞利殊係維拉青訓產品，亦喺維拉成名，上陣213場入32球，直至2021年以天價1億鎊轉投曼城後，因各種原因踢唔出水準，表現大跌，如果能外借重投維拉，將會係佢挽救事業嘅一次轉機。