意大利災難性慘敗　創三大恥辱紀錄

周六(7日)凌晨世界盃外圍賽歐洲區I組，出現意外賽果，傳統勁旅意大利作客以0比3大敗於挪威腳下，並創下3大恥辱紀錄，包括球隊史上首次世盃外上半場失3球，計埋上屆賽事在內，意大利首次遭遇世盃外2連敗，以及連續3場冇波入，令人憂慮呢支4屆冠軍重演噩夢，可能連續3屆無緣世界盃決賽周。

意大利近日有多位球員受傷退隊，人腳不整之下，開賽14分鐘就被挪威前鋒阿歷山大索洛夫射破大門，呢支北歐球隊憑快速反擊踢法，再由紐沙、艾寧夏蘭特各建一功，上半場42分鐘已領先3球。

換邊之後，即使意大利主帥史巴列堤連番作出調動，都未能扭轉敗局，甚至破唔到蛋，今屆首場世盃外就遭受嚴重挫折，加上上屆打和北愛爾蘭0比0，附加賽0比1不敵北馬其頓，意大利史上首次連續3場世盃外冇波入及2連敗，同時第1次世盃外上半場失3球。

賽後意大利領隊史巴列堤表示，將會同足總開會，話球隊需要作出「改變」，外界認為呢位「光頭名帥」前途唔樂觀，並建設請有「球隊醫生」之帥嘅雲尼亞里接手領軍，呢位73歲老帥季中臨危受命執教羅馬，協助球隊由瀕臨降班，最後獲得第5位，意大利普遍輿論認為只有「雲爺爺」先至有能力拯救陷入水深火熱嘅意大利。

至於挪威喺世盃外3戰3勝，出線前景一片光明。