兩代球王首度交鋒　C朗年紀大過耶馬爸爸

今屆歐國聯決賽由葡萄牙對西班牙，最大焦點必定係40歲C朗同17歲拉明耶馬首度喺比賽碰頭，上演「父子級」交鋒，雙方同樣上場歐國聯4強入波，今仗被譽為兩代球王交棒，極具象徵意義。

以年齡計算，C朗的確做得拉明耶馬嘅爸爸，事實上，呢位葡萄牙巨星仲年長過耶馬老竇5歲，實在非常誇張，佢首度效力曼聯期間，贏盡英超、英足盃、英聯盃嘅時候，拉明耶馬仲未出世。

至於耶馬將首次同C朗交手，被傳媒問到遇上「爸爸級」對手，有何感覺時，佢顯得非常謙虛話：「C朗係傳奇人物，非常尊重佢，但我有自己嘅任務，就係贏波奪冠。」

論天份，拉明耶馬比C朗更勝一籌，上年只係16歲就以主力身份協助西班牙捧歐國盃冠軍，期間創出多項紀錄，反觀C朗等到31歲先至首嘗呢項大賽冠軍滋味。此外，耶馬4月為巴塞隆拿100次上陣，成為球隊史上最年輕「百戰球員」，被睇好不久將來可以獲得金球獎及世界足球先生殊榮，成就甚至有機會超越C朗。