法蘭克同意教熱刺　條件要搶麥比奧莫

熱刺日前將「冠軍領隊」普斯迪高路炒魷後，賓福特主帥法蘭克被視為接替頭號人選。據報呢位丹麥領隊已表態願意過檔，而且未上任就提出組軍要求──搶簽曼聯獵物麥比奧莫！

各大傳媒報道，執教賓福特7年嘅法蘭克已同意加盟熱刺，著名記者羅曼諾證實：「熱刺已得悉法蘭克嘅立場，佢想要呢份工作，而且渴望成為熱刺新帥。」51歲嘅法蘭克賓福特仲有合約，預計熱刺要支付1,000萬鎊賠償金先可以成事。

英國《太陽報》消息指，法蘭克未上任已經提出要求，希望熱刺將佢喺賓福特嘅愛將麥比奧莫一齊「打包」，呢位喀麥隆翼鋒目前正同曼聯斟介，25萬鎊周薪嘅個人條件已經傾掂，不過依家「恩師」法蘭克出手或令轉會增添變數。賓福特為麥比奧莫叫價為6,000萬鎊。