比列錫獲巴塞垂青　同費歷克續前緣

西甲冠軍巴塞隆拿喺夏天全力增兵，據報佢哋睇中克羅地亞老將比列錫，呢位36歲老將同燕豪芬合約即將完結，免費轉會啱晒巴塞心水，而且同教練費歷克曾經喺拜仁慕尼黑合作，今次有望再續前緣。

效力過多蒙特、國際米蘭、拜仁慕尼黑、熱刺等大球會嘅比列錫，上年初回流夏德以為「等收山」，點知佢上季轉投燕豪芬踢出極高水平，各項賽事有16個入波同10次助攻，幫球隊贏埋荷甲冠軍。

比列錫嘅合約今夏完結，燕豪芬正傾談續約，不過德國《圖片報》報道，巴塞將會出手搶人，教練費歷克同佢喺19/20球季一齊效力拜仁慕尼黑，而且合作成為「3冠王」。

西班牙媒體報道，費歷克認為比列錫可勝任左右翼等多個位置，好使好用，而簽佢並唔影響巴塞斟介路易斯迪亞斯、拉舒福特等翼鋒嘅計劃。