坦哈格欽點頭號前鋒　舒希克等見面定去留

德甲勁旅利華古遜今個夏天大地震，教練沙比阿朗素同多位主力都決定離隊。據報新帥坦哈格上任後，欽點捷克射手柏德列舒希克為頭號前鋒，不過呢位29歲前鋒近日表明，要等同坦哈格正式會面後，先至決定去留問題。

舒希克效力利華古遜5年，雖然唔係必然正選，但入球率奇高，上季德甲踢19場正選就入21球，當中只有1球係12碼。據德國《踢球者》報道，坦哈格上任後，確定舒希克係頭號前鋒身份，上季同佢分享前鋒位置嘅邦尼菲斯將被賣走。

不過，正為捷克出戰世盃外嘅舒希克，對留隊仍有保留，佢日前表示：「利華古遜今個夏天賣走好多人，好難可以令人冷靜，我嘅去留都要等待轉會市場嘅骨牌效應，好難預測個市場發展。我唔係想轉會，而且我仲有合約，亦同利華古遜一齊實現好多成就，我會等待事情發展，心目中已經有個時間線。」報道指舒希克打算喺季前集訓同坦哈格面對面會談，再決定去留問題。