美國3連敗　普捷天奴回應「跳船」傳聞

明年世界盃決賽周主辦國之一嘅美國又受打擊，周日(8日)凌晨熱身賽主場以1比2不敵土耳其，遭受3連敗，領隊普捷天奴帥位危危乎，更有傳佢成為熱刺新帥人選，但「肥普」立即否認，仲話重返熱刺係不切實際。

美國今仗原本有好開始，開波1分鐘就由積克麥基入波打開紀錄，但無以為繼，土耳其憑艾達古拿、艾度路高奴各建一功，上半場27分鐘已反超前，並領先到完場。

美國繼3月不敵巴拿馬、加拿大後，再遭遇敗仗，令到上年10月開始領軍嘅普捷天奴備受壓力，被傳媒問到有冇打算再次執教熱刺，佢話：「我2019年離開熱刺後，每當球隊換帥，我嘅姓名就會再次出現喺候選名單上，如果你有留意，呢個名單起碼累積超過100位教練名字，其實冇意義，話我重返熱刺，根本不切實際。」

事實上，熱刺要聘請普捷天奴執教，並非易事，因為佢現時解約金達2,100萬鎊(約2.2億港元)，除非美國足總主動解僱呢位53歲阿根廷名帥，否則佢起碼會繼續領軍至明年世界盃結束。