連達斯調轉槍頭幫哥帥　利迷「洗版」轟反骨

曼城今個夏天全面重建，希望新一季可以挑戰利物浦嘅冠軍寶座，而佢哋近日就宣布，請到前利物浦助教連達斯輔助哥迪奧拿。作為前利物浦領隊高普嘅得力助手，連達斯曾承諾「永遠唔會幫其他領隊」，依家突然反口幫利物浦嘅對手，即時成為利迷公敵。

連達斯同高普喺利物浦執教近10年，上年同高普一齊離隊後，佢就情深款款表示：「喺利物浦10年，我個仔都成為地道利市人。我欠呢間球會太多，利物浦冇欠我任何嘢。10年嘅盡心奉獻，同高普完結之後，我永遠唔會再輔助其他任何領隊，專注自己嘅領隊事業。」

連達斯上季執教薩爾斯堡成績差勁，半季就被炒魷，依家更「食言」返英超做哥迪奧拿助手，大批利物浦球迷走去曼城官方社交網「洗版」，指連達斯係「反骨仔」、「兩頭蛇」。不過，據《 The Athletic》報道，連達斯喺答應加盟曼城前，曾詢問利物浦同高普意見，獲得支持後先至簽約曼城。