紐卡素高價斟艾蘭加　益埋曼聯！

成功搶到下季歐聯參賽資格嘅紐卡素，夏天最大目標係收購頂級翼鋒，據報諾定咸森林嘅安東尼艾蘭加已為頭號獵物，轉會費約5,000萬鎊（約5.3億港元）。如果今次收購行動成事，連曼聯都有着數！

據《Chronicle Live》報道，紐卡素球探認為艾蘭加係翼鋒增兵最佳人選，尤其佢同阿歷山大伊沙克喺瑞典國家隊合作無間，相信可融入紐卡素進攻體系。紐卡素上年曾出價3,500萬鎊被拒，今次捲土重來，預計收購價至少達5,000萬鎊。

艾蘭加上季英超有6個入波同11次助攻，係佢自曼聯出道之後最「多產」球季，23歲嘅佢開始步入成熟期，所以深受紐卡素賞識。艾蘭加2年前以1,500萬鎊轉會費由曼聯轉會森林，據報合約內有「二次轉會分帳」條款，如果紐卡素用5,000萬鎊完成收購，預計曼聯可以分到300萬鎊至600萬鎊收入。