阿諾特亮相皇馬　一個細節證明早有異心？

英格蘭球星阿歷山大阿諾特周四(12日)喺皇家馬德里正式亮相，呢位26歲球星喺女友同家人見證下，實現加盟皇馬嘅夢想。不過阿諾特喺發布會嘅演講，就受到利物浦球迷質疑，「出賣」佢一早已有離開利物浦之心，坐到約滿離隊係早有預謀。

阿諾特同利物浦續約拉鋸超過1年，最終喺極大「掙扎」下，最後關頭選擇轉會皇馬。阿諾特喺皇馬發布會上，全程用極流利嘅西班牙文發言：「多謝皇馬同會長畀我呢個機會，我夢想成真。我知道皇馬嘅要求有幾高，我會為球會同球迷盡全力，希望喺呢度成為勝利者。」大批利迷質疑：「阿諾特話3月先決定去皇馬，咁快練好西班牙文真係好勁」、「佢一早已經預備好轉會」、「好明顯2年前已經部署去皇馬」。

另外，阿諾特喺發言入面亦「鬼拍後尾枕」，佢喺記者會話：「我非常、非常興奮！我等呢一日已經等咗好耐。」可能佢講完後都知「出事」，隨即補充：「想澄清番，我講嘅『等咗好耐』，係指等咗幾個星期，唔係話等幾年嗰啲。」