曼聯加入爭奪德甲神鋒　價錢貴到飛起

根據德國《天空體育》爆料，曼聯已經聯絡德甲球隊法蘭克福，希望收購對方射手伊基迪基，由於車路士、利物浦亦睇中呢位即將23歲法國新星，估計法蘭克福起碼要1億歐元(約8.1億港元)轉會費，先至會放人。

伊基迪基上年2月初被巴黎聖日耳門外借去法蘭克福，由於表現不俗，法蘭克福迅速決定以1,650萬歐元買斷佢，事實證明執到寶，伊基迪基今季大爆發，上陣48場入22球及12次助攻，引起各大球會關注，車路士、利物浦早已經想收購佢，曼聯現時亦加入爭奪，令伊基迪基身價水漲船高。

由於伊基迪基仲有4年合約在身，法蘭克福可以吊高來賣，最少要求1億歐元轉會費，曼聯已經斥資6,250萬鎊(約6.6億港元)買入狼隊前鋒馬菲奧斯根夏，仲有冇足夠資金收購伊基迪基，實屬疑問。