【官宣】皇馬簽入17歲「新美斯」　但幫對手踢世冠盃

西甲豪門皇家馬德里正式宣布簽入河床新星馬斯坦奧奴，由於呢位阿根廷國腳要等到8月14日年滿18歲先至可以正式加盟「銀河艦隊」，所以會繼續為河床出戰今屆世冠盃，意味有機會喺淘汰賽倒戈鬥「新老細」。

皇馬近期積極同河床展開談判，最終達成交易，據悉轉會費高達6,320萬歐元(約5.7億港元)，成為阿甲球會史上最高價出售球員，雙方簽約6年。

馬斯坦奧奴可以勝任進攻中場及前鋒，上年2月成為河床史上最年輕入波球員，並於上月首次入選阿根廷大國腳名單，早前世界盃外圍賽對智利後備上陣，以17歲零296日成為阿根廷國家隊史上最年輕披甲球員，潛力非常優厚，加上屬於左腳球員，盤扭及主射罰球能力出色，因而被譽為「新美斯」 。

另有評論指馬斯坦奧奴踢法似另1位阿根廷前鋒祖利安艾華利斯，甚至有人認為佢有巴西球星尼馬影子，河床將於下周三(18日)凌晨世冠盃對浦和紅鑽，屆時可以更加了解呢位天才新星嘅真正實力。