施蒙尼爆響口：四大豪門想簽艾華利斯

馬德里體育會上年夏天豪花9,500萬歐元(約8.6億港元)向曼城收購前鋒祖利安艾華利斯，僅過1年，呢位阿根廷國腳可能又跳槽，教練施蒙尼承認有4支勁旅想簽艾華利斯，為咗令佢開心留隊，必須贏得冠軍。

祖利安艾華利斯效力馬體會首季，上陣54場入29球及7次助攻，唔少豪門都希望將佢收歸旗下，馬體會出世冠盃對巴黎聖日耳門前夕，施蒙尼表示已知4支球隊對艾華利斯有興趣：「祖利安只係25歲，係1位極出色球員，比賽充滿饑渴感、有熱誠，入球能力強，任何球隊都希望得到佢，絕對合乎邏輯，我知道利物浦、巴塞隆拿、巴黎聖日耳門、阿仙奴都想收購艾華利斯，我哋要留住佢，就必須令佢覺得效力馬體會係一件開心嘅事，至於要點樣做，一定係奪得冠軍，全隊要付出110%努力爭奪冠軍。」

祖利安艾華利斯仲有5年合約在身，加上佢屬於馬體會主力，施蒙尼絕對唔會輕易放走呢位猛將。馬體會為咗增強實力，提升下季爭標本錢，準備簽入AC米蘭左後衞迪奧靴南迪斯，艾華利斯明白球隊有雄心壯志，亦會樂意留隊搏殺。