國際米蘭前鋒滯留伊朗　無緣出戰世冠盃

以色列同伊朗互相空襲，伊朗首都德黑蘭等地點遭遇導彈同炸彈襲擊，早前返國領獎嘅國際米蘭前鋒泰尼米，原本打算呢兩日飛去美國出戰世冠盃，但就因為航空癱瘓要滯留德黑蘭，肯定缺陣周三(18日)對蒙特雷嘅賽事，可唔可以出戰今屆世冠盃亦成為疑問。

月初為國米踢完歐聯決賽後，泰尼米就返伊朗踢世盃外，日前仲拎埋伊朗足球先生殊榮，本來諗住攞完獎就直飛洛杉磯會合國米大軍，點知就發生空襲事件，所有民航機全部停飛，而且唔知幾時先會重開，令呢位32歲射手滯留伊朗，國米表示一直同泰尼米保持聯絡。

上年由波圖加盟國米嘅泰尼米，喺意甲首季表現未如人意，各項賽事加埋只得3個入球，不過呢位代表伊朗上陣94次嘅前鋒日前宣布唔會離隊：「伊朗媒體一直傳我會轉會，但意大利從來冇呢啲消息，我同國米仲有合約，如果由我選擇，我想繼續留喺國米。」國米喺世冠盃首戰對蒙特雷，之後就對日本嘅浦和紅鑽同阿甲勁旅河床。