【有片】門將勇救12碼 國際邁亞密驚險執1分
去片睇烏斯達利救出12碼
周日(15日)早上世冠盃揭幕戰，身為東道主美國代表嘅國際邁亞密表現令人失望，遭對手艾阿里圍攻，球王美斯冇料到，錯失入波良機，全靠門將烏斯達利有神勇演出，全場有8次成功撲救，包括撲出12碼，驚險守和0比0。
國際邁亞密強陣出擊，美斯、蘇亞雷斯、布斯基斯都擔任正選，另1位球星佐迪艾巴因傷缺陣。當全世界等睇美斯表演，卻出現反高潮，埃及球隊艾阿里反客為主，創造大量攻勢，並獲得12碼，由曾經效力阿士東維拉嘅前鋒馬莫特查斯古特主射，但被國際邁亞密門將烏斯達利捉到路撲出，呢位38歲阿根廷門神仲有1次擋出對手近門頭槌，果然寶刀未老。
臨完上半場，美斯曾經有1次射門幾乎入波，可惜中楣彈出。換邊之後，雙方都未能打破僵局，最終互交白卷。烏斯達利力壓美斯等星級隊友，當選今場最佳球員。
值得一提，今屆世冠盃搞搞新意思，球證身上佩帶鏡頭，睇直播嘅觀眾能夠以球證第一身角度睇球員犯規動作，亦係正式賽事首次有呢項安排。