阿仙奴第2次報價約基利斯　曼聯屬次選

士砵亭瑞典神鋒約基利斯今夏去向仍未確定，據報阿仙奴提出第2次報價，金額高達7,000萬歐元(約6.3億港元)，而曼聯只係約基利斯嘅「第二志願」。

阿仙奴今夏要搵中鋒，斟介RB萊比錫中鋒班捷文施斯高已有一段長時間，今季佢哋對近年冒起嘅約基利斯更感興趣，於是同期展開斟介，葡萄牙傳媒報道，阿仙奴早前首次向士砵亭報價收購約基利斯，金額總值6,500萬歐元(約5.85億港元)，但遭拒絕，今次屬第2次報價。

雖然第2次報價去到7,000萬歐元，但仍然未能滿足士砵亭，佢哋開價8,000萬歐元(約7.2億港元)，雙方有1,000萬歐元(約9,000萬港元)分歧。

至於曼聯，已淪為約基利斯嘅後備車胎，只有阿仙奴退出談判，曼聯先有機會參與斟介，而且因為有「曼聯稅」，價錢將比阿仙奴更高。