泰維斯玩轉奧脫福　曼聯搞慈善賽冇晒面

周一(16日)奧脫福球場舉行「Soccer Aid慈善足球賽」，世界明星隊5比4反勝英格蘭，阿根廷名將泰維斯「大四喜」成為世界明星隊贏波功臣。呢位曼聯「叛徒」全場被球迷狂噓，佢入波後亦唔客氣大反擊，將手擺喺耳背聽噓聲挑釁，又拉高波衫展示自己個名反擊，搞到曼迷冇晒癮。

呢場比賽為聯合國兒童基金會籌款，英格蘭有朗尼、迪科爾、卡域克、韋舒亞等球星，世界明星隊亦有泰維斯、李華度、雲達沙等名將，仲有其他界別嘅明星名人客串，其中主角就係泰維斯，呢位阿根廷前鋒曾為曼聯贏過歐聯、英超冠軍，但佢喺2009年轉投死敵曼城，就令佢成為球迷公敵，今場一直被狂噓，最終佢用4個入波還擊。

除咗畀泰維斯「落面」之外，著名曲棍球女將姬克後備上陣嗰陣，奧脫福廣播竟然奏起利物浦會歌《You'll Never Walk Alone》，因為姬克本身就係知名利物浦粉絲，難怪球迷喺網上留言：「畀泰維斯寸完再播利物浦會歌，我諗奧脫福以後都唔會再舉辦Soccer Aid。」