拉舒福特向巴塞自薦冇回音　屬第3選擇

巴塞隆拿今夏有意簽入翼鋒，曼聯攻擊手拉舒福特唔止一次向對方自薦，又同巴塞王牌拉明耶馬扮friend，不過據報原來「福仔」只係巴塞嘅第3選擇，前面仲有路易斯迪亞斯同尼高拉斯威廉斯，個個都勁過佢。

拉舒福特今年初外借到阿士東維拉後表現回升，更獲召重返英格蘭國家隊，不過借用期滿後維拉仍然退貨，福仔暫時返回奧脫福，但佢新球季不在球隊計劃之內，肯定會被送走，而福仔亦積極搵班落，佢最想去嘅球隊係巴塞。

早前網上流傳福仔年幼時身穿巴塞球衣嘅照片，又見到福仔同拉明耶馬喺社交網互相點讚，福仔自己更積極加操，希望增值自己吸引買家關注。

西班牙傳媒報道，無論拉舒福特幾努力，呢位27歲翼鋒只係巴塞第3選擇，排頭位係利物浦翼鋒路易斯迪亞斯，而且雙方情投意合，不過利物浦唔會輕易放人，開價8,000萬歐元(約7.2億港元)，巴塞只能畀到6,000萬歐元(約5.4億港元)，差距唔細。

巴塞嘅第2選擇係畢爾包嘅西班牙國腳尼高拉斯威廉斯，佢係歐國盃冠軍功臣，喺國家隊同拉明耶馬雙翼齊飛威力驚人，能力比拉舒福特只高不低，所以福仔想去巴塞，可以話相當困難。