阿迪達痛失副手　天才助教成帕爾馬新帥

阿仙奴領隊阿迪達痛失副手，29歲「天才助教」古斯達將會離隊，擔任帕爾馬新教練，並成為意甲近86年以來最年輕主帥。阿迪達冇咗呢位好幫手，兵工廠新一季想爭標增添難度。

古斯達2020年加入阿仙奴教練團，輔助阿迪達，兵工廠近年成績復甦，呢位西班牙籍助教功不可沒。雖然古斯達年紀輕輕，但其實已經有10年從事教波經驗，加入兵工廠之前，做過馬體會及祖雲達斯U17青年軍教練，所以佢非常熟悉意甲。帕爾馬教練捷禾早前離隊，轉投國際米蘭，會方需要聘請新帥，力邀古斯達加盟。

根據「轉會權威」記者羅曼諾(Fabrizio Romano)爆料，阿仙奴方面已經同意放人，預料古斯達好快會正式接過帕爾馬帥印。帕爾馬上季意甲僅排16位，勉強護級成功，古斯達首次擔正做主帥，下季能否幫助帕爾馬保住意甲席位，大家拭目以待。