皇馬被希拉爾逼和　「沙比時代」首騷甩轆

周四(19日)凌晨世冠盃H組，皇家馬德里展開「沙比時代」第1擊，可惜結果不似預期，喺費達歷高華維迪補時12碼宴客下，只能同沙特球會希拉爾踢成1比1平手。新帥沙比阿朗素首騷甩轆，矚目新兵阿歷山大阿諾特處子戰亦交出尷尬數據，表現令人失望。

皇馬主力基利安麥巴比因病缺陣，對住同樣有施蒙尼恩沙基首度領軍嘅希拉爾，踢到勢均力敵。皇馬34分鐘快速反擊，洛迪高高斯傳中畀干沙路加西亞近門射入；7分鐘後，魯爾阿辛斯奧魯莽犯規輸12碼，魯賓尼維斯操刀幫希拉爾追成1比1平手。

皇馬下半場加強壓力，艾達古拿曾有射門中楣彈出，去到完場前再有法蘭加西亞博到12碼，可惜費達歷高華維迪喺92分鐘操刀被撲出，最終兩隊握手言和。沙比阿朗素成為盧比迪古後，7年來首個首演不勝嘅皇馬教練，佢賽後表示：「球隊需要改變，但做咩事都要時間，我哋會繼續去做。」

其中一個要改善嘅球員係阿歷山大阿諾特，佢今場頻頻以右閘位內切成為中場，招牌長傳5次有3次成功，不過防守數據就好尷尬，5次對抗只得1次成功，仲有12次失去控球權，結果只係踢65分鐘就被換走。