【官宣】巴塞簽1號門神　達史特根嬲爆拒被逼走

巴塞隆拿周三(18日)官方宣布，愛斯賓奴門將祖安加西亞以2,500萬歐元轉會費加盟，呢位24歲球星被視為西班牙最佳年輕門將，預料新球季將會成為巴塞正選。今次轉會亦引嚟騷動，據報巴塞隊長達史特根非常憤怒，認為球會想將佢邊緣化，逼佢放棄餘下3年豐厚合約，呢位德國國腳表明唔會就範。

祖安加西亞上季效力護級份子愛斯賓奴，不過佢嘅表現就備受讚賞，無論身手定係腳下功夫都好好，巴塞就決定啟動佢合約內2,500萬歐元買斷條款，雙方簽約6年，預計將成為巴塞正選門神。連同上季表現出色嘅老將施捷斯尼即將續約，意味效力球隊11年嘅達史特根已變得「可有可無」。

西班牙《每日體育報》報道，達史特根對今次收購非常憤怒，一來巴塞從來冇通知佢買龍門計劃，關於自己嘅去留亦全無音訊，消息指達史特根團隊認為，巴塞係想將佢邊緣化，逼佢放棄仲有3年嘅合約。有傳巴塞同加拉塔沙雷已密斟轉會，但達史特根就堅決唔會就範，表明巴塞要畀足3年合約總值4,200萬歐元嘅人工，先可以踢走佢。

曾競逐巴塞會長職位嘅域陀方治批評：「巴塞真係唔識點樣好好對待自己嘅隊長、傳奇，冇人同達史特根做過溝通，佢要自己睇報紙先知道球會買新龍門」。一個效力巴塞11年嘅球員，最後竟然受到霸凌同杯葛，真係好離譜。」達史特根上季因傷幾乎缺席整季西甲，但季尾已康復，並喺早前歐國聯重奪德國國家隊正選席位。